زهقت من كتر الزن و الشكوى على الفاضي و المليان...مش كده! كفايه بقى! كل حاجه مهما كانت لازم نشوف منها النص الفاضي، انما النص المليان لأ ازاي اشوفوا!! و تقول ازاي و مش ازاي ده يحصل! طب يا عم الحج اتشملل و اتنحرر و اعمل حاجه مفيده بدل ما انت عمال تزعق و تلالي و في الاخر ترمي المسؤليه على حد تعبان و طلعان عينه اصلا عشان يصلح و انت قاعد مأنتخ كل دورك في الحياه انك تتأمر و ميعجبكش العجب ولا الصيام في رجب!!!
طب في يوم فكرت اخره اللي انت فيه ده ايه؟!
انا هقول لك
اولا: - عمرك مهتستريح ولا هتعرف تستمتع ولا اللي حواليك هيستمتعوا بأي حاجه.
ثانيا: - الناس هتبعد عنك! كل الناس، مهما كانت درجه تعلقهم بيك في يوم من الايام، مأنت ببساطه بقيت خميره عكننه و كل واحد فيه اللي مكفيه و زياده حبتين، محدش ناقص سيادتك بكابتك بمودك بكل حاجه فيك.
هتبقى انسان غير مرغوب فيك.
من الاخر، كل واحد ربنا اداله في اديه مفاتيح الدنيا كلها، في اللي بيحافظ عليها على اد ميقدر، و فيه اللي بيرميها واحد ورا واحد بطريقته و اسلوبه.
